Ging kakibot eoman it mga nakakilaea kay Jess Magpusao ro ana nga ging himo nga eskandalo sa Navitas, Numancia ko selebrasyon it kapyestahan ni Sr San Juan De Bautista ko Sabado.
Daya hay matapos imaw nga mag hubeas ag uwa gid it ging pabilin sa ana nga bilog nga eawas bisan ana nga underwear samtang naga saot sa prente it maabong tawo.
Suno kay PO2 Felizardo Navarra Jr. it Numancia MPS, ging reklamo ko mismong tiyo ni Magpusao nga si Leopoldo Magpusao 60-anyos ro ana nga gumankon nga si Jess dahil sa eskandalo nga anang ging himo sa lugar.
Natabo dayang insidente ko Sabado it ala-5:30 it hapon samtang abo nga naga paligos sa Navitas beach tungod ko selebrasyon.
Nasayuran nga una sa idaeom it makahielong nga ilimnon si Magpusao kat nahimo nana nga mag-uba ag uwa gid it nakapugong kana.
Uwa eon nag-file pa it kaso ro anang tiyo matapos nga arestuhon imaw ra it mga pulis ag una makaron naka kulong sa lock up cell it Numancia.
Si Magpusao hay kilaea matapos nga ging deklara nga “persona non grata” sa banwa it Malay dahil sa ana nga mga ging buhian nga maeain nga tinaga kontra sa isla it Boracay.
