Dakpan sa gipahigayong operasyon sa General Santos City Police office ang usa ka miyembro sa Ansar Al Khilafa Philippines nga gidumalahan kaniadto ni Kumander Tukboy Maguid kinsa una nang napatay sa Operasyon sa otoridad sa Sarangani Pipila ka bulan ang nakalabay.
Sumala kang Police Senior Superintendent Leonardo Suan, ang Deputy Regional Director for Operations sa Police Regional Office 12 nga ang suspek naila sa pangalang Ram-Ram Tungan.
Nadakpan kini human mihatag ug impormasyon ang mga miyembro sa Barangay Intelligence Network sa Brgy. Calumpang nga anaa ang presensya niini sa lugar.
Dugang pagbutyag ni Col. Suan nga anaa sa arrest order number 2 ang pangalan sa nahisgutan ug notado kining miyembro sa Ansar Khilfa Philippines nga iladong sympathizer sa ISIS.
Wala na matud pa misukol ang nahisgutan atol sa operasyon apan dihang gikapkapan sa otoridad, narekober ang ubay-ubay nga mga eksplosibo.
Sa kasamtangan, anaa nakakustudiya sa lock up cell sa CIDG 12 ang suspek samtang ginahikay ang kasong rebellion batok kaniya. (Lore Romualdo)
