Self defense ang gihimo sa usa ka gwardiya dihang iyang napusilan ang usa ka panday nga si Ruben Bacalso nga taga Alae, Manolo Fortich, Bukidnon kinsa midayo sa Upper Puerto kagahapong adlawa.
Mao kini ang gibarugan ni Devie Moralde, usa ka gwardiya ug miyembro sa Moro National Liberation Front kon M-N-L-F.
Matud ni Moralde nga mga alas tres ang takna sa kadlawon kagahapong adlawa, dihang pagawas na kini gikan sa ilang panimalay aron mu-duty dihang kalit kini nga giliputan sa duha ka mga lalake.
Nasayran nga ang usa ka lalake nga nagbitbit sa caliber 38 nga armas ang wala maila sa suspect, samtang ang biktima nga si Ruben Bacalso ang nag bitbit sa botelya.
Depensa sa suspect nga iyang unang nailog ang armas sa wala mailang lalake ug dihang bunalan na kini og botelya sa biktima nga si Ruben Bacalso, iya kining napusilan.
Daling misibat padulong kang Datu Didilusan Arroyo ang Chairman sa M-N-L-F Bukidnon Highlander Station Revolutionary Committee sa Maramag, Bukidnon ang suspect sakay sa iyang motorsiklo kung asa nangayo kini sa tambag sa iyang angayng himuon.
Dugang pa ni Devie Moralde nga iyang gilabay ang armas nga iyang gigamit pag pusil ug dayon nga mi-surrender sa kapulisan sa Puerto Police Station pinaagi sa dxCC-RMN.
