Un moher empleyao del municipalidad de Alicia na Zamboanga Sibugay muerto despues ya rega de bala conele el tres persona na barrio Upper Naga-Naga na mencionao lugar del Lunes antede sumi elsol.
Con el victima ya conose como si Marife Bonghanoy, 44, de Kapatagan del mismo municipalidad.
El victima ya sostene monton tupada de bala na cuerpo y ya lleva conele na hospital pero nohay swerte ya declara conele dead on arrival el doctor.
Asegun conel pulis si Marife ta munta na un habal-habal ta maneja si Ariel De Fiesta, 21, del barrio Kauswagan, del mencionao municipalidad pasando sila na Upper Naga-Naga cuando tiene ya lang tres persona muntao na otro motorsiclo ya hace apas canila y el uno del dos ancas derepente ya lang ya rega de bala con Marife.
Cuando ya cai na calsada el victima, el maga suspechao ya atraca pa cunele y ya continua tira mientras ta mobe pa si Marife.
Maga pulis nohay pa puede determina si cosa el motibo y quien el maga hachor del incidente.
