Dipolog City – Igo nalang sa pagtaho sa Dipolog City Police Station ang 20-anyos nga lalaki human gidagit sa wala ilhi’ng karnaper ang iya’ng motor didto sa Magsaysay St. corner Echavez St. Barangay Central dakbayan sa Dipolog.
Ang biktima giila sa kapolisan nga si Kyle Jerjune Morano, ulitawo ug molupyo sa Tabuk Tulay barangay Dicayas ning dakbyan.
Sa gihimo’ng imbestigasyon ni PO1 Nelvin Mangan imbestigador sa kaso nasayran nga mga alas 11:30 sa gabii, giparking sa biktima ang motor xrm kolor itom ug puti kombinasyon dunay plaka numero JA 63424, gawas sa CLS Fast Food sa maong dapit.
Dako nalang ang kangangha sa biktima sa dihang pagawas iyang nasuta nga nahanaw na iya’ng motor.
Gituhoan nga gisakyan kini sa wala ilhi’ng karnaper sibat sa wala hisayring dapit.
Kini na ang ikaduha nga motor ning bulan sa Nobiyembre ang gikataho sa buhatan sa kapolisan nga gikawat human sa unang pagkawala sa Jiangmen Haojue plate number SC 4128 didto sa barangay Galas. (r.m)
