General Santos City–Patay ang usa ka 72 anyos nga lalaki nga naila sa pangalang Rommel Reyes residente sa Barangay Poblacion, Polomolok human nga nabanggaan ang gimanehuan niining motorsiklo nga XRM 125 kolor pula sa usa ka motorsiklo nga RS 125 kolor blue nga gimanehuan ni Averil Carlo Filalan, 33 anyos, residente sa purok 9 brgy. Palkan, Polomolok.
Sa inisyal nga imbestigasyon sa Traffic Management Unit (TMU) sa Polomolok nasuta nga alas 3:35 sa hapon kagahapong adlawa sa may national hi-way corner Crossing Sulit road nahitabo ang insidente samtang gikan sa Gensan ang usa ka motorsiklo padulong sa barangay Palkan nga gimanehuan ni Averil Carlo Filalan uban ang sakay niiining si Jopeth Filalan, 23 anyos, residente usab sa susamang lugar.
Pag-abot sa lugar sa nahitaboan kalit matud pang mitabok ang usa ka motorsiklo nga gimanehuan sa biktimang napatay nga si Rommel Reyes uban ang sakay niining si Nelia Reyes, 70 anyos, hinugdan nga aksidente kining nabanggaan og tungod sa kakusog sa impact nangatumba ang duha ka motorsiklo.
Human sa panghitabo gilayong gipangdala ang mga biktima sa pribadong ospital sa Gensan alang sa ilang medikasyon.
Sa kasamtangan padayon pang nagpaalim ang tulo ka mga biktima sulod sa balay tambalanan tungod sa mga samad sa ulo og kalawasan nga ilang naangkon samtang walay swerte ang usa ka driver tungod nakabsan kini sa iyang hinulamang kinabuhi. (Reynald Timario)
