New Washington, Aklan – Parehong ginpangdaea sa Aklan Provincial Hospital rong mga sakay it magtimbang nga behikulo matapos makaangkon it mga lastro tag raya hay magsunggaban kabii sa Sitio Naga, Poblacion, New Washington, Aklan.
Rong sakay it tricycle nakilaea kanday Diosdado Resus, 61-anyos (driver) ag ro anang asawa nga si Lyn Resus, 47-anyos ag mga residente it Brgy. Mambog , Banga.
Samtang ro mga sakay it motorsiklo hay nakilaea kanday Jan-Jan Aguelo ag may backrider nga si Marlon Traje, tanan sa legal nga edad ag mga residente it Brgy. Panayakan, Tangalan.
Sa imbestigasyon it New Washington PNP nga kabii rayang mag-asawa nga Resus hay halin sa New Washington ag nagapa Kalibo eon kunta pero pag-abot sa may Sitio Naga sanda ra hay sinunggaban it motorsiklo nga ginasakyan nanday Aguelo ag Traje nga nagapaadto man it Brgy. Cawayan.
Nasayuran nga rayang naka motorsiklo hay nag-overtake sa ginasundan man nga tricycle pero ro andang motor hay uwa it iwag ag ginapatihan uwa eagi mapan-uhi rong kasubeang nga tricycle ag naaeang-aeangan rason nga natabo rong aksidente.
Insigida man ra sanda nga gin respondehan it PDRRMO-Aklan, MDRRMO-New Washington, New Washington PNP ag ginpangdaea sa hospital para mataw-an it nagakaigo nga pagbueong.
