Nagpatabang sa kapulisan ang usa ka municipal treasurer sa Catarman human gipusil mga alas 6:45 kagabie sa Burgos, Barangay Poblacion, Catarman, Camiguin.
Swerteng wala maigo ang biktimang 59 anyos nga si Cecenia Jurial nga residente sa nasangpit nga dapit.
Matud ni PO2 Roy Jagape, imbestigador sa Catarman Municipal Police Station nga nakuha nila sa crime scene ang duha ka basyo sa bala sa 9mm pistol.
Gibutyag ni PO2 Jagape nga mga usa ka metro lamang ang gilay-on sa duha ka suspek nga sakay sa motorsiklo sa dihang gipusil ang biktima.
Gidugang ni PO2 Jagape nga motor nga Mio nga kolor puti ang gigamit sa mga suspek nga ila usab nga gipahibalo sa ubang kapulisan sa Camiguin.
Sa karon nagpadayon pa ang gihimong imbestigasyon sa kapulisan sa Catarman aron matumbok ang mga suspek ug ang motibo sa krimen.
