Cadiz City – Maga pangayo sg bulig sa National Bureau of Investigation (NBI) si Mrs. May Montias Catapang, ang asawa ni Architect Albert Capatang nga napatay sa aksidente sa highway sang Brgy. Luna, ciudad sg Cadiz, sang nagligad nga June 13, bangud sa pagkadula sang mas o menos P200mil ka pesos nga dala sang biktima sang ini ang ma-aksidente, para kuntani iga-panweldo sa iya mga tinawo sa construction sang private swimming pool sa ciudad sang Escalante.
Suno sa kay Misis Catapang, P75,000 ang dala sang iya bana nga nabutang sa iya bulsa, samtang ang masubra sa P100,000 ang yara naman sa envelope nga natago sa sulod sang spare tire sa compartment sang Toyata Vios nga iya ginamaneho sang ini ang maaksidente, apang ahaw P700 pesos na gid lamang ang ginturn-over sa ila sang mga rescuer kag pulis.
Wala na makit-an pa ang amo nga kantidad, lakip na ang bag-o nga New Balance rubber shoes nga gina suksuk sang biktima.
Dugang pa ni Mrs. Catapang, gin-ako sang isa ka rescuer nga ini ang may nakapkapan nga nagabukol sa bulsa sang biktima samtang ini ang ila gindala sa Cadiz District Hospital, sakay sa ambulance.
Ang asawa ang wala sang ubra, kag may bata pa nga 3 ka tuig kag mismo ang ilay balay nga gina-istaran ang wala pa man mabayaran.
Dako pa kun tani nga bulig ang amo nga kantidad para sa pagsugod sang magamay nga palangabuhian kon nabilin yadto sang bana sa iya pagtaliwan.
