Nagnubo ang kaso sang teenage pregnancy sa South Cotabato tungod base sa datos sang Provincial Population Office sang nagligad nga tuig yara lang sa 726 kumparar sang tuig 2016 nga nagalab-ot sa 1,259.
Ginkumpirmar ni Provincial Population Officer Zenaida Duron nga nagaedad naman sa 13-anyos ang pinakabata nga nabuntis nga halin naman sa banwa sang Tupi kag Polomolok nga amo man ang nagapanguna sa may mataas nga kaso sang teenage pregnancy.
Ginasundan naman sang Surallah nga may 122, Tupi 83, Norala 82, T`boli 75, Lake Sebu 63, Sto. Nino 47, Banga 45, Tampakan 30, Tantangan 7.
Samtang ang rason nga nakit-an nila kon ngaa may mga kabataan nga timprano pa nga nabuntis ang tungod sa impluwensya sang barkada ukon sang yara sa palibot, kakulangan sang guidance sang mga ginikanan kag tungod sa cellphone subong man facebook.
Ginpahayag ni Maam Duron nga tungod sini mas ginpabakod pa gid nila ang mga programa agud nga mapanubo pa gid ang teenage pregnancy sa probinsya.
Ginpaklaro ni Maam Duron nga ang ila datos sa teenage pregnancy ang halin mismo sa Civil Registrar’s Office sang mga kabanwahanan matapos nga sa datos sang Provincial Health Office tuman ka taas ang kaso nga nagalab-ot sa masobra tatlo ka libo nga nakuha ang datos sa health center.
Nahibaluan nga una na nga nagpahayag si Governor Daisy Avance Fuentes nga nagtaas ang kaso sang teenage pregnancy sa probinsya sang nagligad nga tuig nga amo ang napresentar niya sa national tungod ang datos niya nga gingamit ang iya ka IPHO.
May-angot sini suno sa Provincial Population Officer pagapungkuan nila ang nasambit nga problema matapos nga wala nagasanto ang ila nga datos sa IPHO.
