BACOLOD CITY – Patay ang isa ka tricyle driver matapos tiruhon sa sulod sang baylehan sa Purok Villa Villeta, Brgy. Estefania, syudad sang Bacolod sadtong Domingo sang kaagahon.
Ginkilala ang biktima nga si Ryan Tajanlangit, 25 anyos, residente sang Purok Malvar-Cubay, Brgy. Villamonte, Bacolod City.
Suno sa Police Station 4, nagasa-ot lang sa baylehan ang biktima kaupod sang iya mga abyan kag gulpi lang gin-tiro sang isa ka lalaki.
Ang suspek ang na-identify naman sa kay alayas Toto Gamay, residente sang Abada-Escay, Brgy. Vista Alegre.
Magluwas sa igo sang bala, ang biktima ang ginlampusan pa sang botelya sa ulo sang mga kaupdanan sang suspek.
Si Tajanlangit ang naka-angkon sang pilas sa tuo nga dughan nga naglapos naman sa iya likod nga gintuna-an naman sang iya kamatayon.
Sa inisyal nga pagpangusisa sang pulis, may da-an nga konplikto ang duwa kag ila naman na-tiempuhan ang biktima nga nagasa-ot sa sulod sang baylehan.
