BACOLOD CITY – Posible ang iya ginabatyag nga seizure ang rason kon ngaa nahulog ang isa ka customer sang SM City mall sa Bacolod Reclamation area kaina sang aga nga amo ang gintunaan sang iya kamatayon.
Ang biktima ginkilala kay Jeffrey Cordova, 43 anyos, residente sang Brgy. Alijis, Bacolod City.
Suno sa asawa sang biktima nga ang iya bana ang may seizure ukon hinali na lamang ini siya nga nagakurog-kurog kag posible nga ini ang gin-abot kag nahulog.
Base sa imbestigasyon sang Police Station 1, may mga alas 10:16 kaina sang aga, halos nabulabog ang mall sang may isa ka customer nga nahulog halin sa 3rd floor pakadto sa ground floor malapit sa main atrium sang amo nga mall.
Ginpahayag nga nahatagan pa sang medical emergency procedures ang biktima kag sang pag-abot ang ambulance, dali-dali ini nga gindala sa Riverside Medical Center.
Apang may pila naman ka personnel ukon tenant sang mall nga nagsiling nga ginhungod sang biktima ang paglumpat bangud nakita niya ini sa akto gani nagsinggitan pa ini.
Sa karon padayon ang imbestigasyon nga ginapatigayon sang mga katapo sang Police Station 1 kon bala intentional ukon aksidente ang pagkahulog sang biktima sa amo nga mall./dyHB BACOLOD
