BACOLOD CITY – Padayon ang search and retrieval operation nga ginapatigayon sang Philippine Coast Guard-Negros Occidental sa lalaki nga naglumpat sa isa ka Ro-ro vessel nga magadungka na kuntani sa Bredco Port sadtong December 24 sang gab-i.
Ang biktima ginkilala sang iya asawa nga amo si Rene Quilantang, 38 anyos ang edad, tumandok sang banwa sang Isabela.
Suno sa asawa nga si Nida Quilantang, ang iya bana ang nagkadto sa Capiz agud nga magbisita sa iya mga himata didto kag ila ginpaabot nga ini ang magapauli sadtong December 24.
Apang, siling sang asawa nga natingala sila nga tubtub kahapon wala pa ini naka-abot gani nagpadulong na lamang sila sa Coast Guard agud magpangayo sang bulig.
Angut sini, ginpahayag ni Negros Occidental Philippine Coast Gurd head, Lt. Commander Lodovico Librilla nga gilayon sila nagpatigayon sang search ang retrieval operation nga magadayon tubtub subong.
Madumduman nga ang roro vessel nga ginsakyan sang biktima nga amo ang LCT Archangel nga naghalin sa Dumangas Port, Iloilo ang magadungka na kuntani sa Bredco Port sa Bacolod sang natabo ang insidente./dyHB BACOLOD
