BACOLOD CITY – Natiruhan sang isa ka lalaki nga nagmauy ang iya man lamang kaugalingon kag bangud nga may nasalabat nga isa pa ka lalaki, ini siya ang ginpulihan kastigo kag ginbuno pa kagab-i sa Brgy. 2, Bacolod City.
Nakilala ang suspek nga si John Romel Iglesia, 27 anyos ang edad, soltero kag pumuluyo sang Had. Logway, Brgy. Balaring, Silay City, samtang nasalabat naman ang biktima nga si Arnold Mendoza, 39 anyos ang edad, single kag pumuluyo sang Mabini Coral, Brgy. 30 ciudad sang Bacolod.
Suno sa record sang pulis, may mga la 1:20 kahapon sang hapon ang suspek nga si Romel ang nagkadto sa Purok Kagaykay, Brgy. 2 agud magbisita sa iya abyan.
Apang ginaalegar nga hubog ang suspek, nagmauy kag nag-gabot pa sang iya armas kag nagpanghangkat sang away.
Bangud sini, ini siya ang ginpalapitan sang mga bystanders nga nagresulta naman sang komosyon.
Suno pa sa mga witness sa tunga-tunga sang komosyon, aksidente nga napitik sang suspek ang iya armas kag naigo ang iya kaugalingon, apang ini ang naglapos kag nasalabat si Mendoza.
Pahayag sang mga witness, matapos sang insidente, ginpulihan ang suspek kag may nagbuno sa iya likod ka wala nga kamot.
Ang suspek kag biktima lunsay karon confined sa Corazon Locsin Montelibano Memorial Regional Hospital./dyHB BACOLOD
