Kalibo, Aklan — Posible nga magapangatubang it kasong usurpation of authority rong sangka nagpakilaeang meyembro it Phil. Army ag assign sa 12IB matapos nga magpangmueay it mga katapo kung Kalibo PNP.
Base sa blotter report it Kalibo PNP, una nga nagpakilaea rong nasambit nga persona nga si 1st Lieutenant Ivan Gallardes, 29-anyos ag taga Victorias Negros Occidental kung sa siin nagpablotter nga kuno naduean imaw it daywa ka 45 nga baril nga naga balor it P300,000, plane ticket,
confidential documents ag jacket kung sa siin idto nakabutang to anang kwarta nga nagabalor it P150,000 nga ginbuoe it sangka tricycle driver nga andang gin arkila paadto it Starlight KTV Bar.
Sa pag follow up ag validation nga ginhimo ko mga kapulisan sa anang report sa nasambit nga Bar nasayuran pinaagi kay Jonathan Escalona, Security Guard, James Tangal, bouncer ag Irene Sotto, manager it bar nga nagsueod si Gallardes kaibahan ro tatlo ka mga babaye ag ro tricycle driver.
Bago magsueod si Gallardes ginhambaean imaw it gwardya nga ro anang mga dinaea hay aywanan sa baggage counter pero nagpamalibad raya ag sa tricycle lang suno kana aywanan.
Ko ulihi tag mga hilong eon, una nga gumuwa rong tatlo ka babaye, sumunod rong driver ag nagkatueog sa anang tricycle, nahabilin si Gallardes. Ko ulihi pumanaw rong tricycle driver nga idto pa rong gamit ni Gallardes.
Gindaea si Gallardes sa Kalibo MPS ag samtang imaw gina imbestigahan naging arogante raya ag naghinambae it mga maea-in sa mga kapulisan kaibahan eon si PSINSP. Ronald Paclibar ro deputy it Kalibo MPS hay ginhambaean nga pagasipaon.
Sa dugang pa gid nga pagpangusisa it Kalibo PNP, nasayuran nga ro anang matuod nga pangaean hay si Jomar Helardes ag ro anang rangko hay Private First Class ag uwa na-assign sa 12IB bangud nga uwa imaw sa rooster ag nasayuran nga base sa IR imaw ra hay na discharge sa serbisyo ku July 2017 bangud man sa anang pag ginawi.
Nadakpan mat-a rong tricycle driver sa may crossing Banga samtang nagapagasolina.
Na-recover sa anang tricycle ro bag it tagreklamo kaeakip rong daywa ka cellphone ag kwarta nga 6,000 pesos.
Samtang sa pakikipag-angot mat-a it RMN Klaibo kay Hilardes, gin-ako na kara nga uwat kamatuoran rong anang ginhambae nga tunga sa milyon ro naduea kana, suno kana ana eamang ra nga himu-himo ag bangud sa subrang kahilungon.
Sa makaron hay detained sa lock up cell it Kalibo PNP si Hilardes kamana man ro tricycle driver.
