Kalibo, Aklan — Nag-abot eon sa 6, 135 rong nairekord nga mga OFWs nga infected it sakit nga HIV-AIDS umpisa 1984 hasta makaron nga 2018.
Suno kay ACTS-OFW Partylist Representative John Bertiz, sa 6, 135 nga numero it mga OFWs nga may HIV-AIDS, 86% ukon 5, 280 kara hay mga eaeaki.
Mayorya suno kana it mga eaeaking OFWs nga may HIV-AIDS hay nabuoe halin sa sexual contact sa isigkapareho nga eaeaki nga may 71% ukon 2, 176 samtang rong 1, 586 man hay nabuoe sa sexual contact sa parehong babaye ag eaeaki.
Base sa National HIV/AIDS Registry, nag-abot eon sa 59, 135 confirmed cases rong mga Pilipinong nagpositibo sa HIV-AIDS.
Ginpahayag ni Bertiz nga dapat pabaskugon it gobyerno rong kampanya ag medication kuntra sa nasambit nga sakit.
Ginpadumdom man it kongresista rong POEA ag OWWA nga pabakuron pa rong preventive education sa HIV-AIDS sa mga OFWs ag sa andang pamilya.
Base sa Department of Health gaabot eamang sa katunga ko kabilugang numero it mga Pilipinong may HIV-AIDS ukon sa 31, 458 eamang rong nagpaidaeom sa pagpabueong o Antiretroviral treatment (ART).
