BACOLOD CITY – Duha sa kapin 23 ka mga estudyante sang G. Lopez Jaena Elementary School sa Brgy. 31 nga nakabakal kag nagkaon sang ginbaligya nga lumpia sa sulod sang ila eskwelahan ang gindala sa ospital matapos nagreklamo nagsakit ang ila tiyan kahapon sang hapon.
Nagapang-idaron ini sang 11 anyos sang Brgy. 31 kag isa ka 16 anyos sang Purok Gonzaga, Brgy. Taculing, lunsay grade 5 student sang amo nga eskwelahan.
Suno sa principal sang G. Lopez Jaena Elementary School nga si Sir. Crisostomo Buco, ang natabo amo nga may isa ka nanay nga nakilala kay Glorymae Gineda nga taga Brgy. 27 nga nagsulod sa eskwelahan agud dul-ungan sang panyaga ang iya 4 tanan ka mga kabataan nga estudyante sang amo nga buluthuan.
Lipod sa ihibalo sang eskwelahan, sikreto gali nga nagdala sang lumpia prito ang amo nga iloy kag ini ang iya ginbaligya sa mga estudyante.
Sa pagbulubanta sang iloy, kapin sa 23 ka mga kabataan ang nakabakal kag nagkaon sang lumpia apang ang duha amo ang nagreklamo sang pagpalanakit sang tiyan kag nagsuka gani ini ang gindala sa Out Patient Department sang Corazon Locsin Montelibano Memorial Regional Hospital.
Ginpahayag sang principal nga nahangpan niya ang amo nga iloy bangud naga-panginyadi man ini kay pigado, apang may pagsulundan ang DepEd nga indi pwede makabaligya ang mga transient vendor sa sulod sang eskwelahan kundi sa canteen gid lamang agud ma-practice ang ensakto nga food handling.
Nahibaluan nga naka-agi na gali sadto baligya sa canteen ang amo nga iloy apang halos isa ka adlaw lang bangud nga indi man mabakal ang iya ginabaligya.
Nag-gwa sa findings sang ospital nga ang gintunaan sang pagsakit sang tiyan sang sini nga mga estudyante amo ang intestinal parasite kag dehydration.
Ang duha ka mga kabataan ang balik normal na kag nag-eskwela matapos nga nag-ayo sang ginpangdala sa ospital. /dyHB BACOLOD
