EB MAGALONA, NEGROS OCCIDENTAL – Padayon karon nga ginabulong sa ospital ang isa ka tuig nga bata nga lalaki matapos ini nahulog sa bubon, aga sang tinalikdan nga adlaw sa Brgy. Alacaygan, banwa sang E.B. Magalona.
Nakilala ang biktima nga si Carell James Comprado, pumuluyo sang amo nga lugar.
Suno sa iloy sang biktima nga ginpapanaug sang iya tiyo ang amo nga bata halin sa ila balay, apang wala nila natalupangdan nga ini gali ang nagpalapit sa bubon.
Nakibot na lamang sila sang may nagsinggitan kag didto ila nakita nga nahulog na ang bata sa bubon sang ila kaingud balay nga may kadalumon nga kapin napulo ka tapak ( 10 feet ).
Duha ka minutos matapos nahulog, nakuha ang bata sa sulod sang bubon kag dali-dali nga gindala sa Corazon Locsin Montelibano Memorial Regional Hospital./Not the actual photo
