NAIGO SANG KILAT | Lalaki patay sang naigo sang kilat sa Bago

BAGO CITY – Isa na naman ka tawo ang nabiktima sang pagpangilat kag napatay kahapon sang hapon sa ciudad sang Bago.

Nakilala ang biktima nga si Reynaldo Aranza, 33 anyos ang edad kag pumuluyo sang Sitio Malipayon Baras, Brgy. Ma-ao, Bago City.

Suno sa report nga ang biktima ang gindala pa kuntani sa Bago City District Hospital agud nga madapatan sang bulong, apang wala na ini nakasalbar pa.

Angut sini, ginapahalong karon sang Disaster Risk Reduction Management Unit ang pumuluyo sa tanan nga tion ilabi na kon naga gal-um bangud nga ano man nga oras, indi mapaktan, nagaluntad ang pagpangilat./dyHB BACOLOD