Gikumpirma ni Police Major Edgardo Bernardo, ang Provincial Officer sa Criminal Investigation and Detection Group kon CIDG Bukidnon nga usa sa 1,700 inmates sa tibook nasud nga konbiktado sa heinous crimes nga naka-avail sa Good Conduct Time Allowance (GCTA) Law ang nisurender sa ilaha kagabie, September 6, 2019.
Sa kasayuran nga gipa-abot ni Major Bernardo sa RMN DXMB Malaybalay, gibutyag ninii nga naila ang surrenderee nga si Larry Canunay, ulitawo, 49 anyos ug taga P-10 Puerta, Barangay Lurugan, Valencia City, Bukidnon.
Si Canunay, ang boluntaryong nitahan sa iyang kaugalingon alas 8:05 kagabie ngadto sa detectives sa CIDG Bukidnon Provincial Field Unit pinaagi sa pag-assist ni Brgy. Lurugan Kagawad Nino Tabukalaon.
Ang mao nga surrenderee naka-detine sa Davao Prison and Penal Farm, Davao Del Norte sa wala pa nakagawas kaniadtong March 22 ning tuiga human naka-avail sa GCTA Law. Ang release order gipirmahan ni CSSUPT Melencio Faustino ang regional Supt sa regional office sa Bureau of Corrections.
Nasayran nga si Canunay nasilutan sa RTC Branch 9 gumikan sa kasong rape ug sa RTC Branch 10 tungod sa kasong arson kaniadtong March 22, 1991.
Nakumbinsi siyang misurender human nadunggan ang 15 days ultimatum nga gihatag ni Pangulong Rodrigo Duterte sa ilaha aron dili madeklarang pugante.
Midangop siya aron ipasayod ang iyang ka-andam nga makiglambigit alang sa subli niyang pagkabilanggo kung asa andam usab siyang musunod sa ipagawas nga desisyon batok kanila.
Sa karon gidala kini sa CIDG Bukidnon sa dili pa kini e-turn over ngadto sa Regional Office sa Bucor.
