BACOLOD CITY – Tatlo ka mga aplikante kuntani sa isa ka mall diri sa ciudad sang Bacolod ang naintu-an kag nakawatan sang gadget kag cash sang isa ka lalaki nga nagpakuno-kuno nga may kakilala sa amo nga ulobrahan.
Nagpadulong sa Police Station 1 agud magpa-blotter ang tatlo ka mga biktima nga amo sanday Marilyn Buenafe, Dennis Buenafe kag May Buenafe, tanan single kag pumuluyo sang Had. Salvacion, Brgy. E Lopez, Silay City.
Samtang ang suspek naman nakilala kay Mark Catalan, 39 anyos ang edad sang Patag, Silay City.
Suno sa mga biktima nga ini sadtong nagligad nga Huwebes, mg alas 7:30 sang aga, ginhambalan sila nga may kilala ini nga nagapangita sang 5 ka mga aplikante agud magtrabaho bilang merchandiser kag cashier sa isa ka daku nga mall diri sa Bacolod City.
Pahayag pa sang mga biktima nga ila gin-tabo ang suspek sa Silay public plaza antes sila gindala sa amo nga mall.
Pag-abot sa Bacolod, ginhambalan sila sang suspek nga ibilin sa baggage counter ang ila mga bag bangud indi ini pwede madala sa ila orientation kag training.
Sang natapos na ang training, ila ginkuha ang ila bag kag didto ila nadiskubrehan nga nadula na ang ila mga cellphone nga nagdangat tanan sa masobra 10 mil pesos, cash nga kapin 6 mil, earrings, mga ATM cards kag mga bag./dyHB BACOLOD
