Pormal nga giturn-over sa Probinsya sa Bukidnon ang naluwas nga Philippine Eagle gikan sa Brgy. Magkalungay, San Fernando, Bukidnon ngadto sa Philippine Eagle Foundation nga nakabase sa Davao niadtong Octobre 5, 2020 sa Kaamulan Provincial Zoological Park.
Ang maong pagturn-over gipangunahan ni Provincial Administrator Atty. Jay S. Albarece kauban si Provincial Zoo Curator Dr. Carmen Simene-Tangara, mga kawani sa Valencia City Environment and Natural Resources (CENRO) pinaagi ni Chief Enforcement Edgar Agbayani, mga Enforcement Staff nga silang Venlijohn Adonis ug Melvin Llagas ug sa DENR-EMS I Jo Victoria Kristy R. Cruz. Kini gidawat usab sa Philippine Eagle Foundation pinaagi nilang Mr. Dominic Tadena- Manager, Conservation Breeding ug Mr. Rowell Taraya- Biologist.
Matud pa sa natala nga report sa DENR-CENRO Valencia City, nga ang maong Philippine Eagle naluwas o na-rescue ni Datu Tagyaman Sinangkap gikan sa lit-ag sa baboy ramo sa ilalom sa kakahuyan sa Pantaron Range sa Barangay Magkalungay, San Fernando Bukidnon, kaniadtong October 1, 2020 sa bandang alas 10:00 ang takna sa buntag.
Nakita ni Datu Tagyaman ang maong agila nga nagkalisod nga nalit-ag sa dihang iyang gitan-aw ang iyang kamaisan sa maong dapit. Mikabat ngadto sa 2 ka oras kapin kon kulang ang pag-rescue sa maong datu gumikan sa ka-idlas niini. Iya kining gisulod sa sako ug gidala sa ilang panimalay ug nagplano nga iyang i-surrender sa DENR diin si Datu Tagyaman nasayod pinaagi sa information, education and communication o IEC nga gipahigayon sa DENR-CENRO Valencia City nga kinahanglan protektahan ang Philippine Eagle.
Ang maong agila na-turn-over sa DENR-CENRO Valencia City pinaagi sa impormasyon sa kura paroko sa San Fernando nga si Rev. Fr. Conrado Casas, Jr. kaniadtong Oktubre 4, 2020 sa Purok 6B, Bgy. Magkalungay, Bukidnon, mga alas 12:00 ang takna sa kaudtuhon.
Kini magpabilin sa Philippine Eagle Foundation didto sa Davao aron ipahigayon ang makuti nga health check-up sama sa x-ray ug laboratory aron masiguro kung himsog ba ang maong agila. Human niini, butangan kini ug tracking device aron mamonitor ang lokasyon kung asa siya pagabuhian diin gilauman nga didto gihapon kini pagabuhian sa lugar kung asa kini na-rescue.
