General Santos City— Patay sa gipahigayong operasyon sa militar ang gikonsiderang bomb maker sa teroristang Bangsamoro Islamic Freedom Fighters kon BIFF nga nailang si Norodin Taib.
Sumala kang Major General Cirilito Subijana, Commanding Officer sa 6th Infantry Division nga ang maong operasyon ang resulta sa mas gipakugsang pagmonitor sa mga suspek sa magkasunod nga pagpamomba sa Isulan, Sultan Kudarat
Pamahayag niini nga si Taib maoy utok sa maong pagpamomba ug responsable sa pagbilin sa mga ied nga iyahang ginahimo.
Dugang pamahayag ni MGen. Subijana nga si Taib maoy usa sa mga natudluan kaniadto ni Zulkifli Binhir Alyas Marwan nga usa ka bomb expert ug gika-ingon usab kini nga adopted ni Basit Usman nga kaubang terorista ni Marwan.
Lakip matud pa si Taib sa mga napasakaan ug kaso sa kapulisan human ang maong insidente. Samtang dako ang pagtuo ni Subijana nga adunay dakong epekto sa kalihukan sa BIFF ang kamatayon sa nahisgutan.
Pagpaklaro niya nga padayon ang hugot nilang pagbantay sa siguridad ug ginapaning-kamautan nga wala nay mahitabo pang pamomba sa ilahang area of responsibility.
Kalabot niini gibutyag ni MGen. Subihana nga adunay posibilidad nga nangita na pud ug laing bomb maker ang teroristang grupo human ang kamatayon ni Taib.
Samtang ang nahisgutan matud pa ang miyembro sa grupo ni Kumander Bungos kung asa aduna usab kini iyahang kaugalingong mga miyembro. Apan basi matud pa sa impormasyon nga naka-abot kanila, aduna nay nahitabong panaghi-usa sa han-ay nilang Bungos ug Abu Torayfe.
