General Santos City— Gikumpirma ni Police Senior Superintendent Nestor Salcedo, Provincial Director sa South Cotabato Provincial Police Office nga miyembro sa Ansar Al Khilafa Philippines kon AKP ang napatay sa shootout atol sa checkpoint sa kapulisan sa may Pagalungan, Polomolok milabay’ng semana.
Sumala niya nga basi sa gihimong validation, dili leader sa AKP si Benzaid Nilong kundili usa lang kini ka miyembro ug dugay na kining anaa sa ilahang target list sa mga miyembro sa AKP.
Dugang pamahayag ni Col. Salcedo nga ilaha na usab na-monitor ang pagpang recruitment nga ginahimo sa AKP sulod sa probinsya sa South Cotabato apan sa karon, dili niya mabutyag nga nagpabilin kining aktibo.
Pamahayag niini nga human ang kamatayon sa lider kaniadto nga si Kumander Tokboy Maguid, wala nay aktibidad ang maong grupo gawas sa pagrecruit.
Kahinumduman nga napatay si Nilong human nilang gipabuthanang kapulisan nga nag-checkpoint sa lugar samtang malampusong nakasibat ang mga kaubanan niini nga sumala pa responsable sa managlahing krimen sa area sa Polomolok.
