Hayan masirad-an ang napulo ka establisemento ning syudad tungod sa kasupakan nga ilang nahimo sama sa dili kompletong mga dokumento sa pagnegosyo.
Kini naglakip na sa mga lodging house, bar, spa, internet cafe ug laundry shop.
Gibutyag ni Antonio Resma Jr., ang secretary ug inspectorate team leader sa Regulatory and Complaint Board kon RCB, nga kanunay na nilang gipahinumdoman ang maong mga patigayon ug gihatagan pa nila kini og kahigayonan nga makompleto ang ilang mga dokumento.
Nasayran nga adunay mga lodging house ang wala mag-logbook niadtong mosulod sa ilang mga inn ug mga internet cafe nga padayong nagpasulod sa mga menor de edad.
Gibutyag ni Resma nga sa ilang panagtagbo sa regulatory bodies pinaagi ni Atty. Egay Uy, girekomendar niini nga pasirad-an na lamang ang maong mga negosyo.
Gani, nakaabot na kini sa buhatan ni Mayor Oscar Moreno ug oras nga maaprobahan kini, ila gilayong ipatuman ang pagsira sa maong mga negosyo.
Mahinumdoman, nga sa gihimong pag-inspection sa mga ginsakpan sa RCB daghang negosyo ang adunay kasupakan sa balaod apan ila una kining gihatagan sa notice of violation apan dihang subli nila kining gisusi ilang nasuta nga wala gihapon kini maka-comply sa mga rekisitos nga gikinahanglan.
