General Santos City—karong adlawa na gikatakdang pasakaan ug kaso sa PDEA Regional Office-12 ang gikonsiderang big–time Pusher ug negusyante nga una nang nasikop sa gihimong Search Operation niadtong Sabado October 14, 2017 sa Koronadal City.
Una nang nasikop sa gilusad nga High Impact Operation (HIO) sa PDEA ang narco–businessman nga si Alvin Keith Valerio, 40, residenti sa Block 2, Antipolo Subdivision, Koronadal South Cotabato.
Nasayran nga mukabat sa (150) ka gramo sa suspected shabu nga dunay estimated market value nga P750,000.00; (1) ka digital weighing scale; (1) ka cal. 9mm pistol Silver Beretta; (1) 38 cal. Revolver; (77) ka 5.56 live ammunitions; (1) ka thirty–rounder 5.56 magazine ug managlahing drug paraphernalia.
Kasong kalapasan sa Sections 11 ug 12, Article II sa Republic Act 9165 (Comprehensive Dangerous Drugs Act of 2002) ug RA 10591 ang ipasang-at nga kaso batok sa nasangpit nga suspetsado kansa balhog karon sa silda sa PDEA -12.
Si Valerio ang gikaingong co–owner sa Koronadal Sports Complex Cockpit ug gialigarang drug lord financier. Konektado usab matud pa ang nahisgutan sa El Patron Drug Group nga nagalihukan sa SOCKSARGEN area.
