General Santos City—Mukabat sa 15,000 Board feet sa hardwood ang narekober sa Sulong Kalikasan nga programa sa lokal nga panggamhanan sa Sarangani Province inabagan sa kapulisan ug sa militar sa may Barangay Tuanadatu, Maitum, sa nakalabayng simana.
Sumala ni Bong Tuballes, ang labaw sa PENRO-Sarangani nga ang pagkumpiska sa maong mga kahoy parti sa mas gipakusgang kampanya batok illegal logging sa kabukiran sa probinsya hilabi na sa MAKIMA (Maasim, Kiamba, Maitum) area .
Nasayran nga walay nasikop nga mga illegal logger mao nga nagpadayon pa karon ang gihimong imbistigasyon sa Sulong Kalikasan aron nga mapanubag ang mga responsabli sa iligal nga pagpamutol sa maong mga kahoy.
Dungan niini gimando na ni Sarangani Governor Steve Chiongbian Solon ngadto sa Kapulisan ug sa militar nga pakusgan pa ang monitoring batok sa mga illegal loggers nga galihukan sa probinsya aron mapugngan ang hingpit nga pagkaguba sa klinaiyahan gumikan niining hinimuan sa pipila ka indibidwal.
