Ginsugdan na sang Philippine Statistics Authority (PSA) ang registration para sa Philippine Identification System sa anum ka mga local government units sa Negros Occidental lakip na sa syudad sang Bacolod. Ini kabahin sang amat amat nga rollout sang Step 2 sa mga indibidwal nga pre-registered na nakaligad nga tuig.
Suno kay Luis Gonzales, chief statistical specialist sang PSA – Negros Occidental, ginbuksan na ang mga registration centers sa Bacolod City, Silay City, Bago City kag Murcia.
Sa Bacolod, nahamtang ang PhilSys registration center sa Rizal Elementary School samtang sa daan nga Puericulture Center building sa likod sang City Hall sa syudad sang Silay.
Nakasugod naman sang national ID enlistment process ang mga banwa sang Valladolid kag San Enrique sadtong Pebrero 3.
Lakip sa Step 2 sang proseso ang validation sang mga supporting documents, pagkuha sang biometric information kaangay sang fingerprints, iris scan kag front-facing photographs.
Sa datos sang PSA, yara sa 808,387 low-income houshold head kag members ang na pre-register para sa PhilSys sa bilog nga Negros Occidental.
[image: image.png]
