NBI Bacolod handa magbulig sa imbestigasyon sa pagluthang-patay sa ila anay asset

BACOLOD CITY- Handa nga magbulig ang National Bureau of Investigation (NBI) sa imbestigasyon angot sa pagluthang-patay sa ila anay asset ukon informant sa Purok Malalusan, Brgy. 32, ciudad sang Bacolod, Pebrero 3.

Sa interview sang DYHB kay NBI Bacolod head Renoir Baldovino, paunahon lang nila anay ang imbestigasyon sang Philippine National Police (PNP) sa pagluthang-patay kay Ramy Cientos, 62-anyos sang Purok Everlasting, Brgy. 29, Bacolod, kag kon kinahanglan na, magabulig sila. Ginkumpirmar ni Baldovino nga informant nila sang una si Cientos apang sang 2020 ginpang-recall na ang ila nga mga identification cards (ID).

Sa karon, nagapadayon pa ang imbestigasyon sang Police Station 1 sa krimen agod matumod ang suspek nga nakasakay sa pula nga Toyota Innova nga amo ang nagluthang sa biktima. May nakolekta naman nga kopya sang CCTV ang Police Station 1 gikan sa crime scene.


[image: image.png]

Facebook Comments