Kalibo, Aklan – Natigayon nga maaresto it mga taga Aklan PDEU, PDEA Aklan, Kalibo MPS, Aklan HPG ag Aklan PIB rong sangka negosyante it lugaw matapos nga ginpaidaeom sa buy-bust operation kaina it aga-aga maeapit sa slaughter house sa Brgy. Tinigaw, Kalibo, Aklan.
Rong suspek nakilaea kay JEHDAN DELA CRUZ CORTEZ, 28-anyos, may live-in partner ag residente it Brgy. Mabilo, Kalibo.
Suno kay Police Major Frensy Andrade head it PDEU Aklan nga rayang si Cortez hay nahabakean it 8 ka sachet it ginapatihan nga shabu kabaylo it P 12,000 pesos nga buy-bust money.
Dugang pa ni Andrade nga rayang suspek hay dati man eon nga may kaso nga pagbayolar man sa Sec. 11 it RA 9165 ag sa uman imaw ra hay na monitor it mga otoridad nga nagbalik sa anang bisyo kung sa siin nakipagtransaksyon raya sa mga otoridad ag nadakpan kaina.
Nasayuran man nga rong mga lugar nga sakop ni Cortez Kalibo, Numancia ag Banga.
Samtang ginpamalibaran mat-a ko anang tiya ro natabo nga suno kana saksi imaw nga nagbag-o eon ro anang gumankon.
Nahaadto eamang raya sa slaughter house bangud nga naga kompra raya it mga gina ubrang batchoy, barbeque ag sa lugaw bilang andang negosyo.
Sa makaron rayang si Cortez hay uman nga magapangatubang it kasong pagbayolar sa Sec. 5 it RA 9165 ukon Comprehensive Dangerous Drug Act of 2002.
