Liwat nga nagpanguna ang probinsiya sang Negros Occidental sa may pinakamadamo nga nabakunahan batok sa COVID-19 sa ikatatlo nga adlaw sang National Vaccination Days (NVD) nga ginatawag man nga Bayanihan Bakunahan sa Western Visayas.
Sa data nagikan sa Department of Health Region 6, as of 6:00 pm (December 1, 2021), gikan sa 107,101 nga nabakunahan sa bug-os nga rehiyon, naglab-ot sa 35,229 ang mga Negrense.
Ginasundan ini sang Iloilo Province nga may 24,032 vaccinees samtang 14,344 sa Capiz; 10,238 sa Antique; may 8,983 gikan sa Aklan; 7,636 ang sa Iloilo City; 4,551 sa Guimaras kag may pinakamanubo nga nabakunahan ang Bacolod City nga may yara lamang sang 2,088.
Sa partial, unofficial record sang DOH Region 6, naglab-ot sa 489,587 ang kabug-usan nga nabakunahan sa tatlo ka adlaw nga National Vaccination Days apang ang opisyal nga report igapaguwa subong, Disyembre 2.
