TACLOBAN CITY – Antis pa man madakop an mga notorious nga budol-budol gang ha syudad han Tacloban, mayada pa hira nabiktima nga usa nga babaye kakulop nga waray na magpakilala ha media, nadali an iya 50, 000 pesos.
Kakaiba it strategy han mga suspek, magpapakilala hira ha ira bibiktimahon nga sangkay han ira anak o ira pamilya ngan papasakyon ha ira kotse ngan didto na huhudimhudiman nga baga hin mahihinoptize an biktima ngan ighahatag an dara hini nga kwarta ha mga suspek.
Maupay nala ini nga bag-o nga ira ginbiktima nga babaye in nakaghuna-huna hin maupay pagkatapos makuha ha iya an kwarta. Deretso hiya nagpabulig ha mga kapulisan.
Sumala kan PSInsp. Edwin Canamaque, Officer-In-Charge commander han TCPO station 2, ginpakitaan hin mas damo nga kwarta an biktima kabalyo han kwarta nga iya gindadara pero dida han nahimasmasan na hiya mga papel la ngayan an sulod han envelop.
Ginkilala an mga notorious nga budol-dudol suspek nga hira Sandy Alerta, 24 anyos may asawa, Luse Busa, 59 anyos, waray asawa, pareho nga residente ha Brgy. 5 Can-Avid, Eastern Samar ngan hi Linda Regal, 45 anyos residente ha Luzon Ave., Brgy. Matandang Balara, Quezon City ngan hi Margarita Busa, 56 anyos residente ha Brgy. Bombon, Tabaco City.
Kasagaran nga ginbibiktima hini nga mga suspek in mga idaran na.
Pumakadto liwat ha TCPO station 2 an duduha pa nga biktima, an usa in maestra nga nakuhaan hin 300, 000 pesos ngan an usa naman nga biktima in nakuhaan hin 70, 000 pesos.
Suspetsa han Tacloban PNP nga damo pa gud an nabiktima hini nga mga suspek.
Papasakahan hin kaso nga estafa an mga ini pero kay bailable man pwede la gihapon magpakagawas ha presuhan, sanglit an nakikita nga solusyon han pulisya kinahanglan pumakado ha ira istasyon an iba pa nga nabiktima hini para mapasakahan ini hin damo nga kaso ngan diri na ini makagawas pa.
Samtang padayon nga nagsasagdon an Tacloban PNP nga usa la it solusyon para diri mabiktima hin budol-budol, don’t talk to strangers.
