NEGROS OCCIDENTAL – Gin-ako sang New People’s Army, NPA Central Negros Command nga sila ang may kahimuan sa natabo nga duha ka serye sang pagpangsunog sang duha ka truck sa separado nga insidente sa Negros Occidental kag Oriental.
Sa press release nga ginpagwa sang Leonardo Panaligan Command sang NPA Central Negros Guerilla Front pinaagi sa spokesperson sini nga si Ka JB Regalado, gin-ako sang rebelding grupo nga sila ang may kahimuan sa natabo nga pagpangsunog sang isa ka truck sang tubo nga ginapanag-iyahan ni Lito Alvillar sa Brgy. Budlasan, Canlaon City, Negros Oriental sadtong Pebrero 22 sini nga tuig.
Gin-ako man sang NPA nga sila pa gid ang responsable nga nagsunog sang truck nga ginapanag-iyahan ni Jorge Vargas sang Taborda, La Castellana sadtong nagligad nga February 26, 2018.
Suno kay Ka JB nga ini ang sabat sang rebelde sa pasulit-sulit nga psywar, pagpang-into kag patalang nga kampanya sang Armed Forces of the Philippines kag sang pasista nga US-Digong Duterte nga pagpa-surrender sa CPP/NPA sa isla sang Negros.
Ginpahayag ni Ka JB nga sanday Lito Alvillar kag Jorge Vargas ang pareho lang nga wala nagatamod sang mga reklamo sang ila mga obreros sa pihak sang tuman nga kapi-ot ukon kapigado sa pagpangabuhi.
Siling sang NPA, makaluluoy ang mga obreros bangud halos balhas kag dugo na ang mag-agay sa ila mga lawas, nagbaligya sang ila kusog lamang mapakaon, ma-edukar kag mabuhi ang ila mga kabataan./dyHB BACOLOD
