NEGROS OCCIDENTAL – Ginahangkat karon sang Leonardo Panaligan Command sang New People’s Army ang Philippine National Police nga padasigon kag padalman ang imbestigasyon sa kamatayon ni P/Supt. Santiago Rapiz.
Suno sa Spokesperson sang LPC-NPA nga si Ka JB Regalado nga sa pagkabalo sang NPA, wala sang criminal record si Rapiz diri sa Isla sang Negros kag wala man sang involvement sa illegal drugs kag wala naga-gamit sini.
Ginpahayag ni Regalado nga ang ila lang pagkakilala kay Rapiz amo nga isa ini ka atleta, basketbolista, sports minded kag soft spoken nga police officer kag may madamo na sang accomplishments resulta sang iya maayo nga performance.
Siling sang NPA, wala sila nagapati nga ang re-assignment ni Rapiz ang bunga sang iya pagpabaya sa trabaho kundi mani-obra ini sang opisyal sang PNP nga may angut sa sindikato, druglords kag mahigko nga pamolitika sa probinsya.
Lubos man nga wala nagapati ang NPA nga kabahin siya sang mga Ninja/Narco Cops sa isla suno sa PDEA kag ni President Rodrigo Duterte rason sang pag-assign sini sa Dipolog City, Zamboanga.
Bangud “tunok sa alagyan” sang mga sindikato nga ilegalista kag durugista si Col. Santiago Rapiz, sistematiko nga gindaga sang matag-as nga opisyal sang PNP ang nasambit nga opisyal gamit ang Counter Intelligence Task Force (CITG) kag PDEA sa katumanan sang kontra-druga nga kampanya sang US-Duterte nga rehimen.
Si Rapiz dugang na sa sobra 13,000 nga biktima sang Oplan Tokhang sang sini nga rehimen.
Madumduman nga si Rapiz ang gintiro sadtong Lunes sang gab-i, Nobyembre 5, 2018 sa compound sang San Andres College, Dipolog City matapos ini siya ang naga-basketball./dyHB BACOLOD
