Kalibo, Aklan – Nadugangan eoman rong numero it mga namatay sa probinsya it Aklan bangud sa masakit nga dengue matapos nga mamatay rong sangka construction worker kaina it aga-aga samtang ginabueong sa ICU it Aklan Provincial Hospital bangud sa nasambit nga masakit.
Rong biktima nakilaea kay Arnold Tenorio, 34-anyos ag residente it Brgy. Minaa, Ibajay, Aklan.
Base sa sugid ko misis it biktima nga nagatrabaho ro anang mister sa isla it Boracay bilang construction worker kung sa siin nag uli raya ko nagtaliwan nga Biyernes (Agosto 23) ag nagsugid nga gina eagnat ag nagasakit ro anang tiyan.
Pagka Lunes (Agosto 26) hay gindaea ro biktima sa Ibajay District Hospital para nga ipa check up pero nasayuran nga positibo rong biktima sa dengue matapos rong ginpatigayon nga dengue test.
Insigida raya nga ginrefer sa Aklan Provincial Hospital ag naadmit sa Isolation Ward ag ko Huwebes hay ginsaylo imaw sa ICU bangud sa gulpi nga pagnaba it anang platelet ag kaina it aga-aga raya hay ginbawian it hueam nga kabuhi.
Kung matandaan nga sa pinaka latest nga update ko Agosto 24 hay nag-abot eon sa 19 rong namatay ag may 4, 679 ka mga kaso rong na record it PHO-Aklan sa nasambit nga masakit kung sa siin mataas it 339 percent kon ikumpara ko nagtaliwan nga dag-on sa kaparehong period.
