NEGROS OCCIDENTAL – Nakibot kag nagpahayag sang kasubo si Bishop Gerardo Alminaza, Obispo sang Diocese sang San Carlos sa alleged sexual abuse sang isa ka pari nga nakilala kay Rev. Fr. Aaron Buenacosa sang Caduhaan Parish sa isa ka 4-ka tuig nga bata nga babayi.
Sa Official Statement nga ginpagwa sang Obispo, ginsiling sini nga sa atubang sang panawagan sang Santo Papa nga “all out battle” batuk sa sexual abuse of minors, sila sa Diocese of San Carlos ang nagahangkat sang “walk the talk” ukon himuon ang kon ano nga ginahambal.
Suno kay Bishop Alminaza nga iya na nasugilanon ang amo nga pari kon diin ginpasiguro niya sini sa Obispo nga wala niya nahimo ang gina akusar sa iya kon diin siya mismo ang nakibot man sa akusasyon kag handa siya atubangon ang mga allegations agud mapamatud-an nga ini siya ang inosente.
Ginpahayag ni Alminaza nga ila naman nasugilanon ang pamilya sang 4 ka tuig nga bata nga ginasiling gin-molestiyahan sang pari kon diin ginpasiguro nila sa pamilya nga concern sila sa paghatag sang nagakaigo nga pag-atipan sa bata kag pag-intervene sa issue.
Ginsiling pa ni Alminaza nga nagtanyag man ang Diocese sang bulig kag suporta sa akusado kag sa iya pamilya lakip na sa iya pastoral council kag sa mga naapektuhan nga pumuluyo sang iya parish community.
Ginklaro sang Obispo nga sa atubang sang ila pagkilala sa legal nga proceso sa imbestigasyon sa kaso sang pari, ang simbahan magapatigayon man sang ila kaugalingon nga canonical process nga pagalakipan sang paghatag sang pastoral care sa alleged victim kag sa akusado kag sa sin-o man nga involve sa imbestigasyon.
Sa karon may ginpahamtang na nga pari nga amo ang temporaryo nga maga take over sa parokya nga ginbayaan sang akusado nga pari.
Gintakpan ni Bishop Alminaza ang iya statement pinaagi sa pagsiling:
We are committed to search for truth and to make sure the process will be fair and just to both parties and whoever is responsible will have to face the consequences.
We draw consolation from Pope Francis that “if our hearts are open to mercy, we proclaim before the world that it is possible to overcome evil with good.”/Agnes Apostol
