Onsehan sa banlasan, duha patay sa pagpangluthang.

Dead on the spot ang duha ka mga banlasero matapos luthangon sang tatlo ka mga suspek pasado alas 10:00 sang gab-i sa Crossing Datal Mangisi, Barangay Tablu, Tampakan, South Cotabato.
Ginkilala ang mga biktima kanday Rodel Magumway Puli, 19-anyos kag Joseph Maguling Tacuyan, 28-anyos.
Samtang ginkilala naman ang mga suspetsado kanday Roger Maguling Tacuyan, Lando Maguling Puli kag Ronnie Puli pareho residente sang nasambit nga lugar.
Base sa imbestigasyon sang Tampakan PNP, bag-o pa nagluntad ang insidente gin-utod suno pa sang grupo ni Ronnie Puli ang hose nga nagasupply sang tubig nga ginagamit sang grupo ni Tacuyan sa diin pareho imbolbado sa iligal nga pagmina sa nasambit nga banwa.
Bangud sa insidente, gilayon suno pa nga ginluthang ang mga biktima nga nangin tunaan sang ila hinali nga kamatayon.
Kaangot sini ,ginpahayag ni PSI Rafael Banggay, hepe sang Tampakan MPS nga rido kag onsehan sa banlasan ang ginalantaw nila nga motibo sa nasambit nga insidente sa diin indi suno pa magpasugot ang magtimbang nga grupo nga mas dako ang parte sang isa.
Dugang pa ni Banggay boluntaryo naman nga nagsungka sa ila ang isa sa suspek nga ginkilala kay Roger Tacuyan bitbit ang homemade shotgun nga gingamit sa krimen bangud luyag sini limpyohan ang iya pangalan bangud wala suno pa sya sang labot sa nagluntad nga insidente.
Apang pasakaan sa gihapon suno pa sang kaso nga murder ang suspek bisan pa nga nagsungka ini sa kapulisan.