Giklaro ni Senator Bong Go atol sa iyang pagbisita dinhi sa Cagayan de Oro nga dili apektado ang operasyon sa Malasakit Center kabahin sa kamandoan ni Presidente Rodrigo Duterte nga pagpasira sa mga outlet sa Philippine Charity Sweepstakes Office o PCSO.
Gibutyag sa senador nga duna nay daan nga budget ang PCSO diin ang koleksyon niini karong tuiga igahin alang sa sunod tuig.
Ang Malasakit center usa ka one-stop-shop nga gi-establisar sa mga pampublikong hospital alang sa paspas nga proseso sa paghatag medical ug financial assistance alang sa mga kabus nga pasyente.
Kini gidumala sa mga representante gikan sa Department of Health, Department of Social Welfare and Development Office, Philippine Health Insurance Corporation, Philippine Charity Sweepstakes Office ug uban pang ahensya sa gobyerno.
Sa kasamtangan, mikabat na sa 38 ang ihap sa Malasakit Center nga na-establisar sa bisan asang lugar dinhi sa Pilipinas.
Gipahibalo usab ni Senator Bong Go nga dunay dugang 10 milyones pesos nga medical assistance ang ihatag sa Malasakit Center sa Northern Mindanao Medical Center.
