BACOLOD CITY – Ginpa-blotter sang napulo ka mga manugbaligya sang palupok sa ciudad sang Bacolod ang hepe sang Bacolod City Police Office nga si Police S/Supt. Francisco Ebreo sa Police Station 1.
Ang mga nagpa-blotter ginpangunahan sang head sang grupo sang mga firecracker vendors sa Bacolod nga si Allan Pacheco kag sang mga miembro sini nga sanday Lilia delo Sario, Alonzo Sumagaysay, Erlinda Trasmane, Ester Tadia, Analyn Sumagaysay, Theresa Robaton, Metchel Bermudes, Jivy Lastimoso kag Josephine Aguilar.
Suno sa grupo nga mga las 8:30 sang aga sadtong Disyembre 31, ginconfiscate sang mga katapo sang BCPO ang ila mga nagkalain lain nga palupok, particular ang katay kag 5-star base sa mandu ni Ebreo.
Natingala ang mga manugbaligya suno sa ila kon ngaa ginconfiscate ang ila mga baligya kasunod nga may yara man ini sang DTI permit kag may lisensya man ang amo nga palupok.
Ini ang rason suno sa ila kon ngaa ila ginpablotter ang hepe sang BCPO sa Police Station 1.
Sa interview sang dyHB kay Ebreo nga klaro sa mga vendors nga illegal ang five-star kag whistle bomb basi naman sa Implementing Rules and Regulation sang Executive Order ni President Rodrigo Duterte.
Sang Disyembre 31 sang aga may mga nagsurrender sang amu nga mga palupok sa ila man hingyo pagpainsende.
Apang pagkagab-i may mga impormasyon nga nagabaligya naman ini rasun nga ginhimo ang test buy kag nagpositibo.
Gilayon naman nga ginpatigayon ang operation kag ginpangconfiscate ang mga illegal nga palupok.
Nakibot nalang si Ebreo nga kaina sang aga, ginpablotter sya bangod wala man sang problema ang ila operation kontra illegal nga palupok.
