Sarangani Province–Gawas sa TESDA Regional Training Center nga pagatukuron sa Sarangani Province nga may pondo nga P150 Milyones ka pesos, mubarog napud sa dili madugay sulod sa Kapitolyo sa Sarangani ang opisina sa Civil Service Commission para sa General Santos City og Sarangani Province.
Sa giduso bag-uhay lang nga resolusyon ni Board Member Arman Guili sa komitiba sa imprastraktura sa pagsuporta sa kinatibuk-ang Sangguniang Panlalawigan, gitagaan og pagtugot sa Sangguniang Panlalawigan si Governor Steve Chiongbian Solon aron pirmahan ang Deed of Usufruct tali sa Civil Service Commission aron ma-konstrak na ang duha ka andana (2-storey) nga SarGen Civil Service Field Office may kantidad nga Syete Milyones ka pesos (P7M).
May gigahin nga 300 square meters ang Provincial Government sa Sarangani alang sa maong Civil Service office building. Dakong tabang kini aron mas epektibo og daghang pa ang maserbisyuhan sa Civil Service hilabi na sa mga kawani og personahe sa lokal og nasyonal nga gobyerno, lakip na ang mga mukuha sa Civil Service exam tungod kay duol og dali na lang kini adtuan.
Apan mas labing nalipay si Governor Solon tungod kay laing trabaho na usab ang naghulat sa mga yanong construction worker sa Sarangani Province inig sugdan na unya ang konstraksyon.
