BACOLOD CITY – “Pray the Rosary from the heart, seriously.” Ini ang mensahe nga luyag ipalab-ot sang caretaker ukon tag-iya sang rebolto nga Our Lady Of Fatima nga gina-alegar nagahibi ukon nagatulo ang luha.
Ginpahayag nga ang amo nga imahen sang Our Lady of Fatima ang yara nahamtang sa isa ka magamay gid lamang nga chapel sa compound sang isa balay diri sa ciudad sang Bacolod.
Suno sa tag-iya sini nga nagapakilala gid lamang kay “June” tuig 2004 sang iya ginbakal ang imahen sa St. Paul Manila agud i-regalo sa ila iloy, apang sang napatay ang ila iloy sadtong 2011, wala na nila pa naatipanan ang image ni Fatima kon diin ginbutang na lamang nila ini gani sa higad kag gindisplay.
Apang suno kay June nga sadtong July 28, 2013 ini siya ang ginpadamgo sang imahen kon diin may nagduhol sa iya sang isa ka sulat nga nagasiling: “Please pray the rosary from the heart, seriously”.
Pahayag sang tag-iya nga bangud sang amo nga damgo nagdesisyon si June nga kuhaon ang imahen kag ibutang sa tupad sang Divine Mercy kon diin isa siya ka deboto.
August 7, 2013 ukon pila ka adlaw matapos ginplastar ang imahen, may na-notice sila nga naga-gwa nga daw tubi halin sa mata sang Fatima nga kon lawtawon, kaangay sang luha.
Bangud sini, suno kay June amat-amat nila nga ginplastar sa gamay nga chapel ang image nga sumugod sadto ini ang ginapangamuyuan na sang Holy Rosary.
Nagapati siya suno kay June nga ang pagpadamgo sa iya kag ang pagtulo sang luha ang Our Lady of Fatima ang mensahe nga dapat hugot magpangamuyo para sa kalamidad kon diin gin-angut ini ni June sa natabo nga linog sa Bohol kag bagyong Yolanda sang 2013.
Sini nga 2018 nasulit ang kaangay nga hitabo kon diin ginpahayag ni June nga antes pa man ang kontrobersiyal nga statement ni Pang. Duterte nga “God is stupid” liwat siya nga ginpadamgo sang Our Lady of Fatima nga nagasiling: may kinagamo nga matabo sa tunga sang gobierno kag simbahan.
July 7, 2018 ukon sadtong nagligad lang nga Sabado, nakita ni June ang liwat nga pagtulo sang luha ni Fatima, apang sini nga tion, indi na tubig kundi pula nga bagay kaangay sang “dugo.”
Nagapati si June nga ini ang nagadala sang mensahe nga dapat pangamuyuan sang hugot ang aton pungsod agud indi na magdanak ang dugo.
Ang amo nga imahen sang Our Lady of Fatima ang nagataas sang 18 inches kag nagasangkad sang 6 inches kag ini ang hungod nila nga wala ginbuksan sa publiko kag nagapabilin nga pribado agud indi matublag ang ka-sagrado sang imahen kag ang mensahe nga ginadala sini./ Albert Giner photos/ RMN
