Malaybalay City, Bukidnon – Dili matud pa mahimong wagtangon ang Bureau of Customs kon BOC taliwala sa gikalambigitan niini kontrobersyal nga paglusot sa illegal nga droga.
Sa interview sa RMN Malaybalay ngadto kang Atty. Antonio Soriano, convenor sa Citizens Watch for Good Governance – Region 10 gibutyag niini nga kung wagtangon man ang BOC, tukuron lang usab kini ug balik tungod kay mao kini ang tig-kolekta sa buhis sa mga goods gikan sa gawas sa nasud.
Ang problema matud pa ang mga tawo ug ang sistema sa buhatan maong nanglusot ang kontrabando.
Matud ni Atty. Soriano nga kaniadto adunay gitawag nga Society Generali Security usa ka international organization nga gikontrata sa gobyerno aron maoy istriktong mokolekta sa buhis. Giwala lang usab daw kini tungod kay dako ang gibayad sa gobyerno maong pagwala sa SGS, ang gobyerno sa Pilipinas na mismo ang nagkolekta.
Gipahayag pa ni Atty. Soriano adunay grupo ni Commissioner Nicanor Faeldon ang nga anaa sa BOC nga kauban sa oakwood mutiny ug wala matud pa kini income sulod sa pila ka tuig ug posibleng natintal kini karon nga anaa na sa customs.
Angayan matud pa nga kaniadto pa nag-resign na kini sila tanan human nga gi-angkon nga adunay mga nanglusot nga illegal nga droga sa ilawom sa ilang pagdumala.
