Nagplano karon ang mga transport groups sa Northern Mindanao nga ilang isugyot ang pagpataas sa plitihan sa pampublikong sakyanan gikan sa 7.50 pesos ngadto na sa 10 pesos.
Kini ang gibutyag ni National Confederation of Transport Union o N-C-T-U Regional Coordinator Joel Gabatan.
Tungod na usab matud pa kini sa walay hunong nga pagsaka sa presyo sa gasolina, nga nakaapekto na sa matag adlaw nga pangita sa mga drayber.
Gihangyo sa N-C-T-U ang The Solidarity of Transport Alliance in Northern Mindanao-Pinagkaisang Samahan ng mga Tsuper at Operator Nationwide nga ilang isugyot ang pagpataas sa plitehan aron usab dili mabentahaan ang mga drivers ug operators.
Alang sa kabahin ni Ringo Lago ang Secretary General sa Starex Piston Northern Mindanao nga makiangayon ang dies pesos nga plitehan kay sa public hearing nga gipahigayon nakita nga angayan na kining patas-an.
Nasayran nga ang 7.50 nga plitehan anaa lamang sa 40-42 pesos nga litro sa gasolina apan karon misaka na kini sa 47-49 pesos busa angayan na lamang nga usbawan ang plitehan labina sa mga public utility jeepneys.
Mahinumduman, nga naprobahan na sa konseho sa syudad ang usbaw nga plitehan sa motorela sa syudad kung asa ang siete pesos ang regular fare gikan sa kasamtangang sais pesos.
