CEBU CITY – Pasado alas sais sa buntag karong adlawa dihang mi-ulbo ang sunog sa may Sitio Almasin, Brgy. Calamba ning siyudad sa Sugbo. Mikatay pa gyud ang sunog sa laing sitio nga mao ang Alseca. Giisa sa Task Force Bravo ang sunog. Kapin oras una nakontrolar sa kabomberohan ang sunog.
Gibana-banang 60 ka panimay ang naugdaw ug 500,000 pesos ang danyos sa sunog. Suma pa sa otoridad, drug den kuno ang balay nga maoy sinugdanan sa sunog. Daghan nga mga residente ang miingon nga daw naa kunoy ga pot session sa 2nd floor sa maong panimay sa wa pa ang sunog. Apan karon wa pa mahibaw-e og unsa gyud ang hinungdan sa kayo.
Usa sa mga nasunogan mao ang estudyante nga si Azariah Wynne nga tigpaminawan gyud og iFM. Naugdaw og apil ilang panimay. Mga imahe sa santos ug gamayng sinina mao ra ang ilang nabitbit kauban iyang mama ug papa ug pito ka igsuon. Safe ra nuon sila apan suma pa niya, grabe kuno nilang karatol atong panahona. Gidagan gyud dayon niya iyang lolo ug lola sa pikas balay. Safe ra gihapon iyang mga apohan.
Suma pa ni Azariah Wynne, pagkaon ug kapoy-an ang ilang labing gikinahanglan sa pagkakaron. Gipapuyo una ang tanang biktima sa Villa Remedios Parish sa maong lugar.
Para sa inyong mga hinabang sa mga pamilya nga nasunogan palihug lang og message sa iFM 93.9 Cebu facebook page o Boy Kirat Ifm facebook account. Pwede pud ninyong ihapit inyong mga donasyon sa RMN Broadcasting Center sa iFM/DYHP nga naa nahimutang sa ground floor sa Capitol Central Hotel and Suites, Escario St., Capitol Site, Cebu City.
Mudawat pa mi og hinabang hangtud Septyembre 1. Magpahigayon ang iFM Cebu team og feeding program kauban sa Pages Holdings Inc. ug manghatag pud og relief goods sa mga biktima.
