Ang pag-adjust sa problema sa bag-ong sistema sa edukasyon, uban sa lain pang problema ang hinungdan sa pagpakamatay sa mga estudyante karong panahona.
Kini ang panlantaw ni Maam Stella Ferrarez, usa ka Mental Health Consultant kabahin na sa nahitabong pahikog sa 19 anyos nga babae, sa Barangay Gusa bag-ohay lang.
Matud ni Ferrarez, kini ang maghatag og depression sa biktima, nga nagresulta sa pagbaton og mental illness.
Dugang pa ni Ferrarez nga possible nga ang panagbulag niini sa uyab ang hinungdan sa pagpakamatay sa dalaga, apan tungod kay kini usa ka estudyante, possible usab nga aduna kini gihambin nga problema sa pagtuon.
Walay normal nga tawo ang maghunahuna sa pagpakamatay.
Gibutyag ni Ferrarez, nga ang mga biktima nga nagpakamatay anaa sa state of severe depression o aduna nay mga sintomas nga gipakita sama sa walay gana sa pagkaon, wala paggawas sa kwarto, ug uban pa.
Dugang pa ni Ferrarez nga kung ang usa ka tawo makamugna na og gitawag nga ‘’emotions’’ dili kini dali nga mawala tungod kay lisod alang niini nga buhi-an ang usa ka tawo nga importante sa iyang kinabuhi.
Kini ang usa sa hinungdan kung nganong naghikog patay ang 19 anyos nga dalaga bag-ohay lang tungod kay nabug-atan na kini sa gibati.
