General Santos City—Padayong ang ginahimong makuting imbistigasyon karon sa Police Station 6 kabahin sa pagpamusil sa usa ka opisyal sa terminal sa van nga nahimutang sa J. Catolico Avenue, Barangay Lagao atubangan sa usa ka baligyaan ug motorsiklo.
Sumala pa ni Police Chief Inspector Donald Cabigas ang hepe sa Police Station 6 ang trabaho niini isip opisyal sa nasangpit nga terminal ang gina tan-aw nila nga motibo sa pag pamusil patay sa biktima nga si Mapulo Dior Kamid, 37, usa ka negosyante ug termporaryong nanimuyo sa Agan North, Barangay Lagao.
Posible matud pa nga adunay na -inggit ngadto sa nasangpit nga biktima hinungdan nga kini gipatumba sa suspect tungod kay wala man usab kini nakalaban sa maong lugar ug usa usab matud pa kini ka maayong tawo.
Sa kasamtangan dili pa mabutyag sa kapulisan kung aduna na silay ginasundan nga person of interest sa maong panghitabo apan gipaniguro ni PCI Cabigas nga ilang tutukan ug maayo ang maong kaso.
Sa karon gidala na sa Malapatan ang patayng lawas sa biktima aron usab nga ipahiluna ang patayng lawas niini basi sa tinuohang Islam human kining makabsan sa iyahang kinabuhi sulod sa balay tambalanan.(Dave Silagan)
