Gikumpirmar ni Prexey Elipe ang kanhi overseer sa Mis Or Cares nga giundang ang operation sa MisOr Cares karong panahona.
Matud ni Elipe nga gihunong ang operations sa MisOr Cares aron nga ma-re-evaluate ang maong programa.
Dugang pa ni Elipe nga gitun-an karon pagbalik ang maong programa tungod kay ang tumong ug tuyo niini, mao ang pagserbisyo sa katawhan sa Misamis Oriental aron kini makatabang sa problemang panlawas.
Dako ang pagtuo ni Elipe nga gisagop sa katawhan sa Misamis Oriental ang programa, tungod kay maayo ang pagdawat niini.
Nasayran nga sa pipila ka tuig sukad nahimugso ang MisOr Cares, nakita nga gisuportahan kini sa katawhan sa lalawigan.
Tungod sa resulta sa milabayng eleksyon nga gipadaug sa katawhan sa Misamis Oriental ang mga tawo nga supak sa MisOr Cares nga programa sa kapitolyo probinsiyal hinungdan nga subling kini nga tun-an karon.
Matud ni Elipe nga sa gihimo nga pagtuon, nakita base sa resulta sa miaging piliay, klaro nga adunay problema ang katawhan sa programa ug possible nga wala giganahan tungod kay nagpili kini og mga tawo nga supak niini.
Dugang pa ni Elipe nga kung ugaling mahukman nga mabalik ang programang Mis Or care base sa re-evaluation, dinhi na ma-incorporate ang component sa Universal Health Care, nga mao ang programa sa Department of Health kon DOH.
Kini nga programa ang i-integrate ngadto sa Misamis Oriental Care System nga pagadumalahon, sa local nga pangagamhanan sa lalawigan sa Misamis Oriental.
