Indi pa pat-od ang pagbalik byahe sang mga fast crafts Bacolod-Iloilo vice-versa sa Oktubre 31. Ini ang ginpahayag sa DYHB ni Frank Carbon, chief executive officer sang Metro Bacolod Chamber of Commerce and Industry (MBCCI) kag isa man ka fast craft operator.
Suno kay Carbon, may patigayunon pa sila nga virtual meeting subong nga aga upod sa mga representatives sang mga alkalde kag governors sang Region 6. Ginpahayag ni Carbon nga wala sa gihapon sang uniform protocols ang Bacolod City, Iloilo City kag mga probinsiya sa rehiyon.
Bukas na kuntani ang ciudad sang Iloilo para sa tanan nga sahi sang travelers basta nga magsunod lang sa minimum health protocols apang ang ciudad sang Bacolod indi pa magbaton sang mga byahero nga tuyo lang maglagaw ukon leisure travel santo sa Executive Order 67 nga pirmado ni Mayor Bing Leonardia.
Dugang pa ni Carbon nga istrikto man ang health protocols nga luyag ipatuman sang mga gobernador sa Panay. Luyag kuntani ni Carbon nga maplantsa na ang issue sa leisure travel sa Bacolod bangud halos 40-50 porsyento sang pasahero nga halin sa Panay ang mga nagalagaw diri sa ciudad.
Kahapon sa isa ka interview, ginpahayag ni MARINA Region 6 Director Jose Venancio Vero nga 90 porsyento sang byahe sang mga fast crafts Bacolod-Iloilo vice versa ang mabalik na sa Oktubre 31.
[image: image.png]
