General Santos City—Gibutyag ni Gensan City Election Officer Atty.April Mitchor-Miguel nga walay angayang kabalak-an ang katawhan sa pagdeklara sa Comelec og red hot spot ang tibuok Mindanao.
Sumala pa ni Miguel nga ang gihimong deklarasyon sa maong buhatan usa lamang ka precautionary measures kalabutan sa nagkaduol nga midterm eleksyon aron malikayan ang kagubot sa nagkadaiyang lugar sa Mindanao.
Dugang saysay sa opisyal nga dili tanang lugar sa Mindanao dunay kasamok nga nahitabo panahon sa eleksyon apan dili lang gayud pwede magkumpyansa hinungdan nga gibutang sa hot spot ang Mindanao aron masiguro ang kahapsay og kalinaw sa umaabot nga eleksyon.
Matud pa atty.April Mitchor-Miguel nga padayon sa gihapon ang koordinasyon sa Comelec sa kapolisan og kasundaluhan kabahin sa peace and order aron lamang gayud masiguro ang kahapsay og kalinaw sa matag lugar sa umaabot nga eleksyon.
Pagpaklaro usab ni Miguel nga ang pagdeklara sa Comelec og hot spot sa Mindanao dili buot pasabot nga gubot na gyud ang lugar kundili gipahugtan lang ang seguridad tungod sa mga nagakahitabo nga kagubot sa ubang parte sa Mindanao panahon sa eleksyon. (Reynald Timario)
