Kalibo, Aklan — Gina estudyuhan makaron it Department of Interior and Local Government (DILG) ro planong pag limita sa numero it mga turista nga magabisita sa isla it Boracay kamana man ro mga imprastraktura.
Suno kay DILG Undersecretary Epimaco Densing III, nagahimo makaron rong Department of Environment and Natural Resources (DENR) it pagtuon sa “carrying capacity” ukon kaabuon it tawo nga makaya it isla para maamligan raya sa uman nga pagkasamad it palibot ag kaeakip eon man ro paglimita sa mga igapatindog nga imprastraktura sa isla.
Dugang pa ni Densing, nga uwa pa nanda matumod sa makaron kung san-o pwede maka umpisa ro mga turista ag ko mga tourist operators ro andang pag-book it mga flights.
Ginasaligan nga magabukas it uman rong isla sa buean it Oktubre matapos raya nga ginsarado ag ginpaidaeom sa rehabilitasyon.
